全臺灣走代先 新竹縣啟動宗教場所ESG評鑑
加入公視會員，
按讚收藏你關注的報導
發布時間：
更新時間：
新竹縣內攏總有211間寺廟、教會等等宗教場所，今年開全國先例啟動宗教場所 ESG 評鑑，評鑑範圍包括紙錢減量以及環境美化、友善種作、社會公益、財務管理等等，希望透過鼓勵的方式發揮宗教的影響力，鬥陣為環境保育貢獻心力。（新聞標題、導言及內文皆為台語文）
向委員解說教堂推廣環保所做的努力，新竹縣攏總有211間的寺廟、教會等等的宗教場所，為著欲打造出環保信仰文化，這嘛是全國第一个為宗教場所咧辦 ESG 評鑑的縣市。
天主教天使教堂基金會執行秘書 張念慈：「透過ESG的這个宗教場域的能見度佮逐家分享，其實宗教毋是干焦敬禮抑是一寡儀式，然後嘛會當透過這方面，來熟似教會，抑是熟似其他的宗教。」
委員講評鑑內容包括「環境永續」、「社會責任」方面做標準，而且閣會以對社會公益佮地方貢獻，針對無仝規模的、無仝型的宗教團體做出評分。
新竹縣宗教場所ESG評鑑委員 錢浩瀚：「節能減碳猶閣有環境教育、友善耕作佮資源回收閣利用，這部份去評鑑；社會責任就會注重伊的急難救助、公益捐助，猶閣有教育佮文化等等的作為。」
新竹縣政府民政處長 陳建淳：「上主要就是希望宗教會當來響應阮的環境永續的這个環節，猶閣有就是針對這个社會責任的部份，猶閣有，按怎做一个通光治理這部份。阮是分三大的主題來協助，新竹縣各宗教場域來共這三項工課做予好。」
新竹縣政府指出只要通過評鑑的單位，攏會有兩萬到五萬現金的獎勵，向望透過評鑑佮獎勵的機制，予宗教發揮閣較大的影響力，做伙為地球環境盡一份心力。
記者 張君豪 新竹報導
唐嘉良/編輯
