高雄一口灶5人駛車摔落山 今確定2死3失聯
發布時間：
更新時間：
昨昏（7/30）暗時，台20線高雄六龜佮桃源的敆界，可能是車路路基攏空去，害一台轎車跋落山坎。警方表示，車頂是一口灶5个人，駛車是姓李的查埔人，伊有走出來喝救人，閣隨轉去救某囝，自按呢就失去聯絡。經過警消人員透暝搜救，今日（31）早起，已經揣著2个人的遺體，毋過因為雨傷大，10點半先暫停搜救。消防人員表示，只要山區天氣有較好，就會隨落去揣人。（新聞標題、導言及內文皆為台語文）
無人機畫面的正中央，就是姓李的查埔人，一家伙仔駛車跋落去的崩山地點，也就是台20線81公里，對路面到崁跤150公尺深，差不多是十樓懸，7/31早起搜救人員趁著雨閬縫用綁索仔的方式，沓沓仔切落去溪埔走揣失蹤民眾。消防人員講，姓李的駕駛，家己peh起來喝救人了後，閣翻頭轉去救某囝，後來就失去聯絡，車頂除了伊佮太太、一个三歲的後生佮拄滿月的查某囝，閣有太太佮前翁生的17歲查某囝，早起已經揣著兩具遺體。
高市特搜第一分隊副中隊長 黃靖堯：「對下面落大概有150公尺到170公尺（深），阮有綁索仔大概有三段的索仔，到接觸著第1位看著的罹難者，無完整的大體；佇距離大概二、三十公尺（遠）的所在，有發現第二名受困者。」
因為山區的雨傷大，搜救行動佇10點半先喝停，猶有三人失聯。想袂到11點時，六龜的寶來里、新開、荖濃佮桃源的高中里，有2559戶出現失電，閣加上六龜一直摒大雨，市府也對寶來做預防撤離，員警一戶一戶通知，359人攏先徙到溫泉會館歇睏。民眾講，已經落三、四工雨，才拄咧想講攏無停電爾，就隨失電矣。
六龜區寶來社區發展協會理事長 鐘享桂：「伊電有線路歹去伊毋知，這馬咱這个寶來欲去桃源的車路損害去，怹電力公司的車閣無才調過來修理。」
因為交通中斷，台電換對另外一頭的線路先送電，大約下晝一點復電。目前台20線真濟搭路段崩去，雨若無停，掣流的溪水會持續沖割山坪造成路基流失，為著欲避免災情擴大，公路局也緊急調來肉粽角，同時調派大型機具，針對交通中斷的所在進行搶通。
記者 許嘉茹 邱紹揚 高雄報導
唐嘉良/編輯
823公投》重啟核三，你怎麼看？
