林智堅棄養任內市狗？ 2021年送轉去動保所
發布時間：
更新時間：
新竹市佇2020年前市長林智堅時期，市府對動保所揣來一隻流浪狗棕棕，閣宣佈成為市狗，但是最近煞予民眾發現講，棕棕若像夆棄養閣轉到動保所等待領養，引起討論。新竹市府證實棕棕來到市府一年外了後，就去予前市府送去動保所，目前由志工照顧。（新聞標題、導言及內文皆為台語文）
這是往過新竹市府幫棕棕翕的影片，後來棕棕閣佇2020年前市長林智堅時期，來到市府擔任市狗，無想著棕棕煞予人發現若像夆棄養，又閣轉來到收容所等待認養，民眾認為前市府哪會當認養以後閣棄養，批評講根本只是利用狗來當做是宣傳的工具。
民眾：「按呢足無應該，袂使共狗仔當做是宣傳的工具。既然過來市府矣，伊（年歲）閣遮大，已經十三歲，就應該好好仔照顧伊。」
民眾：「畢竟狗是一條性命，（市府）既然共認養過來，利用了後閣倒轉去動保所，老矣，真正是足可憐。」
對此市府證實2021年，棕棕就予前市府送轉到動物收容所，經過志工照顧後目前棕棕已經十三歲，健康狀況誠好，也開放民眾認養。
新竹市動保所所長 楊家民：「棕棕是2018年入來動物收容所，2020年到市府一段時間了後，佇2021年閣再轉來到動物收容所。棕棕佇動物收容所的這段期間，由保育員佮志工細膩照顧，雖然伊這馬已經超過十三歲，毋過動物的精神狀況佮活力，攏猶閣非常正常。嘛歡迎有意願認養棕棕以及其他動物伴的民眾，踴躍來動物收容所認養。」
動保所指出棕棕過去是市府代表tshuā轉去市府飼，毋是由個人認養，一般的民眾咧認養了後，是袂當閣退回動保所，所以民眾認養進前一定愛確定，家己敢有照顧的能力，也希望逐家以認養來代替買賣。
記者 張君豪 新竹報導
唐嘉良/編輯
