六月是家庭暴力防治月。根據衛福部的統計，家庭暴力的通報被害人是愈來愈濟，舊（2024）年超過13萬人。有婦女團體表示，無一定講家暴愈來愈嚴重；數字增加，表示現代人有通報的意識，勇敢徛出來。（新聞標題、導言及內文皆為台語文）
囡仔長期看著家庭暴力，雖然身軀無傷，毋過藏佇心內的痛，是會影響一世人的。逐冬的6月份是家庭暴力防治月，自從家暴防治法佇1988年實施以來，通報案件毋但無減少，顛倒一冬比一冬濟。
婦援會執行長 杜瑛秋：「我感覺足大的原因是講，逐家知影欲防治暴力的時陣，愛敲電話去通報。家庭暴力通報的案件愈來愈懸，我看一下敢若逐年，攏五千、六千人咧成長。」
根據衛福部的統計，家庭暴力通報被害人，對111年的12萬3千人，到112年13萬2千人，甚至佇113年增加到13萬8千人。佇第一線服務的社工指出，真濟兒童因為看著家庭暴力，會錯誤認為透過暴力就會當解決問題，佇伊成年了後面對著親密關係的時，拄著問題，有可能就會仝款用暴力的方式來對待伊身軀邊的人。
婦援會婦幼部督導 李雅君：「會談的時陣伊講，阮爸爸媽媽嘛是按呢，阮翁、阮太太的爸爸媽媽嘛是按呢，所以阮才會知影講，伊是對原生家庭學習來的。」
社工分享講伊捌拄過一个案例，囡仔佇學校上課的時陣攏咧睏，老師掠準講伊上課無認真，經過了解才發現，伊暗時攏咧聽爸母冤家，根本就無睏。婦女團體呼籲，若發現厝邊有這款狀況，千萬毋通感覺家己家婆，會使先觀察，也愛趕緊通報，無的確你的一个動作，就會當幫助囡仔行出烏暗的日子。
記者鄭亞宣 林郁凱臺北報導