前幾工，有民眾佇高雄買臺鐵便當，拍開發現內面有虼蚻；想袂到昨昏（6/18）暗，有民眾佇板橋買臺鐵便當，魚丸咬開，內面有塑膠索仔。臺鐵便當的食安一直出問題，引起議論。臺鐵表示，調查了後，是臺南的魚丸廠商無咧顧品質，怹已經暫停合作。（新聞標題、導言及內文皆為台語文）
虼蚻規隻好好，出現佇便當盒仔內底。這是高鐵左營站的臺鐵便當，予民眾感覺真譀古。代誌才發生無偌久，這馬換板橋的臺鐵便當也脫箠。有民眾佇網路貼文，講這粒魚丸仔，按怎咬就咬袂斷，詳細看才發現，竟然出現塑膠索仔，予民眾看了心驚驚。
民眾：「大概半年內攏無想欲食矣。」
民眾：「無想欲買。」
民眾：「食進前會小可仔注意一下。」
民眾：「若是講短期內，出現第二改，著愛加注意矣。」
對此臺鐵是回應，便當內面的香菇虱目魚丸有塑膠索仔，是供應廠商的問題，目前已經停用庫存的貨，也會向廠商求償。雖然有脫箠，毋過支持臺鐵便當的民眾猶是真濟，也有人替臺鐵便當加油。
民眾：「對臺鐵有信心。」
民眾：「我相信臺鐵會馬上改進。」
民眾：「猶閣會使啦，因為有當時仔可能嘛會有蟲走入去。」
新北市衛生局也派人去了解，查出來有問題的便當，雖然是佇新北市咧賣，毋過做便當的廠商是佇臺北市，抑若魚丸的供應商是來自臺南。目前已經請臺南的衛生局，去現場稽查。
新北衛生局食品藥物管理科長 楊舒秦：「便當製造商位佇臺北市，貢丸（魚丸）的來源是臺南市的廠商，會移請製造商所管轄衛生局去查辦。」
臺鐵便當一直攏是真濟人佮意食的便當，舊年（2024年）一年就有8億6300萬的營收，平均每個月賣出75萬粒便當。如今食安問題一再出包，恐驚也加減會影響民眾對伊的信心。
記者鄭亞宣 林郁凱臺北報導