前鎮漁港開81億改造 多功能運銷中心延工期
發布時間：
更新時間：
開81億改造的高雄前鎮漁港，其中的多功能運銷中心，原本是舊（2024）年底就愛完工，煞一直拖到今攏無收尾。最近高雄閣落大雨，毋但漏雨，里長佮店家嘛反映，運銷中心的擔仔位設計無符合實際需求。漁業署表示，針對地方反映的代誌，會揣時間開說明會，收集意見來改善。（新聞標題、導言及內文皆為台語文）
高雄前鎮漁港的下晡市攤商，佇臨時的攤位無閒處理魚仔，因為原本舊年底愛完工的多功能運銷中心，已經做三冬矣，到今大門口、內部的間隔攏亂操操，只會當小可仔看著粗胚的型，有攤商講，進前有予怹入去看，漁業署的設計用意真好，毋過真正無合用。
攤商：「怹講甲足簡單矣，講阮處理區愛另外一个、阮愛另外閣租一个，阮賣的所在閣愛另外一个，那按呢是毋是會造成阮愛分做兩爿？按呢分做兩爿的時，阮的跤手欲按怎？」
攤商 許小姐：「我是感覺，伊無適合阮這種鋸魚的攤商。因為阮做的物件攏是重的，你閣愛搬起去窗口，才閣捒入去處理，按呢傷食力矣。」
漁業署副署長 陳建佑：「會去了解攤商的需求，佇符合衛生安全，無拍折的前提下，盡力去做修正。」
漁業署答應，會開說明會收集意見，才來做改善。其實前鎮漁港攏總欲開81億來改造，這陣毋但運銷中心的規畫受質疑，外面早市喝魚仔這區，也有攤商反映，建築的補強施工影響出入路線。里長講，工程用分區方式來做，毋過除了動線無好閣有漏水的問題，怹希望海洋局佮漁業署，愛趕緊改善。
高市前鎮區明孝里長 林浤澤：「因為B區中央有阻隔，致使A區佮C區的攤商，怹佇串聯頂懸有困難。包括欲補貨嘛好，抑是民眾欲採買嘛好，這攏有造成營運上的困難。」
高市海洋局副局長 鍾致遠：「魚市場B區，原則上會佇7月初六開放，予攤商進場營運。到時陣ABC全區，會全部開放予攤販賣物件。」
攤商強調，進前規畫的時陣怹已經提供看法，毋過實際做出來的猶是無仝，這馬干焦向望會當做調整，毋通予怹等三年外，最後猶是一場空。
記者 許嘉茹 邱紹揚 高雄報導
唐嘉良/編輯
823公投》重啟核三，你怎麼看？
