芳苑火葬場說明會 自救會500人去現場抗議

民眾情緒激動，濟濟人hőng擋佇外口，無法度入去彰化火葬場說明會現場。彰化縣政府拍算欲佇芳苑鄉公墓邊的一塊殯葬用地，起火葬場，縣府5/27佇咧芳苑佮彰化市，舉辦環境影響公開會議，佇芳苑鄉的會議現場，有民眾因為反對火葬場情緒激動，無細膩跋倒受傷。

民眾講：「莫共伊振動、莫共伊振動，振動驚會閣較嚴重，莫振動。」

二林芳苑反火葬場自救會表示，火葬場欲起佇芳苑，對當地佮相隔壁的二林鎮影響大，自救會認為，目前彰化人口減少、加上交通利便，彰化無一定愛起火葬場，尤其芳苑二林有濟濟作穡人，就驚火葬場會影響當地環境。

二林芳苑反火葬場自救會成員謝心色講：「第一場阮家己芳苑鄉親阮認矣，第二場in竟然叫25个鄉鎮的人員欲共阮欺壓、欲來壓迫阮，你叫25个鄉鎮毋免承受後果的人，來共咱講欲支持火葬場，起佇阮二林芳苑，按呢無人吞會落。」

縣府表示，空氣、噪音的汙染，攏有相關的管制佮防護措施，抑若民眾佇會議中提出的意見，嘛攏會完整記錄落來。

彰化縣政府民政處副處長陳俊男講：「阮會做伙，阮絕對袂共恁落勾，每一張環評意見書攏會送去(環評)委員會做審查。」

自救會嘛指出縣府煞佇仝一工、仝一个時間，辦兩場公開會議，予自救會無法度攏參與，in批評縣府欠缺溝通的誠意。彰化縣政府表示，彰化縣性命園區是縣內重要的公共建設，為著擴大縣民參與，才會辦兩場會議，縣府嘛表示會收集民眾的意見，後續會依照環評委員審議的結論辦理。