臺南歷史建築佳里郵便局 拋荒到今未修復

前身是日本時代設的「蕭壠郵便受取所」，後來佇1915年改名做「佳里郵便局」，建築採日式切角頂設計，外觀造形真優美，嘛是臺南唯一保留的日本郵電官署建築。毋過這陣對外觀看，厝頂已經塌落、梁柱嘛有倒落的情形。有民眾反映，2019年就啟動修復計畫，至今猶無進展。民代5/26辦會勘，初步了解是產權問題，目前由郵政協會參電信協會各持一半。電信協會雖然有意願捐贈產權予市府，毋過郵政協會無表態，民代表示後續會協調。

財團法人台灣電信協會王幹事講：「阮是非營利性的財團法人，所以逐冬阮會當運用的資源誠有限，加上古蹟維護愛開的錢攏是千萬起跳，所以協會無法度一改共經費做到位。」

立法委員郭國文講：「你若欲按怎，規氣所有權撥用予地方政府，管理單位、所有權單位一致，這个狀況之下需要去協調。」

另外這爿西港，是民國26年建的「劉厝警察官吏派出所」，112年予人認定做市定古蹟，根據了解，這棟建築已經30幾冬無使用，目前地方雖然有咧討論欲修復活化，毋過產權仝款複雜，閣牽涉18个地主，若投入真濟經費修復，落尾地主無同意，就會白了工。文化局講，產權問題愛先確認清楚，才通規劃後續活化用途。

臺南市警察局警政監林郁誌講：「因為土地阮警察局託管三份一，全部攏移予市政府，由市府來媒合相關單位來做利用。」

臺南市文化局副局長林韋旭講：「產權的部份阮會佇這段時間來協商，包括私有的閣有兩个協會公有產權的移撥，阮會同步來處理。」

目前這兩棟歷史建築，文化局表示會盡力修補處理。若針對產權部分，市府後續會閣調查，嘛同步啟動相關程序，積極向中央爭取預算支持，向望有歷史價值的古蹟建物，通閣重現風華。