高雄仁武寵物鱷魚偷走出門 湖內烏豬四界傱
發布時間：
更新時間：
高雄市仁武區透早有民眾佇路邊看著一隻一公尺半的鱷魚咧走，趕緊通報農業局來掠，原來這隻鱷魚有人飼，無細膩才走出來。另外湖內區嘛有民眾飼的黑豬佇大路四界傱，閣衝紅燈險險予車挵，因為已經危害交通安全，警方當咧找揣烏豬主人欲共處罰。（此則新聞標題、內文為臺語文。）
5/12透早七點外，湖內區的湖中路已經變青燈，車輛準備欲起行，毋過對中華街彼爿煞雄雄傱出來一隻黑黑大大的動物，共看較真咧，竟然是一隻黑豬，這隻豬都按呢生生狂狂佇車路四界走，甚至閣走入去附近國小內底，因為速度實在傷緊，看著的老師攏叫是家己目睭花，哪會有豬佇學校走。
高雄市明宗國小校長黃俊傑講：「其實山豬是沿阮學校的圍牆邊仔走，無一下仔就走出去矣，現場有幾若位老師佮囡仔有看著，老師佮囡仔看著(豬仔)是誠驚喜，in感覺講遮山豬若是會當入來共阮的學生囡仔鬥陣上課，嘛是誠心適的一件代誌。」
雖罔囡仔歡喜看著豬仔，想欲佮豬仔做伙上課，毋過湖內分局表示，這隻豬敢若是去予主人tshuā轉去，因為豬仔烏白走已經危害著交通，這馬當咧走揣主人準備開罰。另外5/13透早{佇仁武也有民眾看著一隻150公分長的鱷魚佇路裡走，驚一下趕緊通報農業局。農業局表示，這隻鱷魚予主人飼佇工廠兩年外，前一工共徙出來桶仔，才無細膩去予走無去。
高雄市動保處副處長段奇漢講：「經過調查這隻鱷魚的品種是目鏡凱門鱷，體型大約150公分長，下晡這隻鱷魚的主人郭先生已經有來動保處完成訪談筆錄，而且嘛將鱷魚領轉去矣，動保處呼籲主人愛做好管理責任。」
高雄連紲兩工有黑豬佮鱷魚佇車路賴賴趖，有人感覺心適，佳哉無害人受傷，動保處呼籲民眾，厝內底的寵物愛關予好，若是違反規定，上懸會當罰一萬五千箍。
曹詠涵/編輯
