臺灣府城隍廟356週年 舉辦巡城祭鬧熱滾滾

三透早六點半，臺灣府城隍廟神轎起駕，規个廟埕鬧猜猜，這回閬19冬閣辦「巡城祭」。今年府城建城300冬，這擺活動以「城隍」做主題，隊伍欲行一輾舊府城，沿路踅東、南、西、北四大城門，全程12.7公里。

臺灣府城隍廟主委 郭榮哲表示：「對四个城池，阮請市政府委託各區的區長，來佇東門城、南門城、西門城佮北門城，來坐鎮接駕。」

廟方這回邀請全臺各地11間城隍廟來鬥熱鬧，各大廟宇嘛搬出濟濟奇巧的陣頭、文物來慶贊，像全臺首邑縣城隍廟請出三百冬來毋捌出來巡境的五塊自然神牌位，抑是北部有的廟宇是頭擺落南來巡境賜福。

台北府城隍廟主委 林賢順表示：「阮毋捌來遮繞境過，這改in三百週年有邀請阮臺北來。」

全臺首邑縣城隍廟主委 黃百榮表示：「伊是有社稷、山川、風雲、雷雨佮城隍五塊，阮就是講別人無的，阮這改特別刁工共請出來繞境。」

其實民國69年佮95年就捌辦過，不而過廟方講，這回是真真正正落去巡城門，嘛有城隍巡查四方庇佑眾生的意涵。另外，這擺廟方毋但重製45冬前的「24司爺」官服，佇路關圖嘛拍破往過的設計，共文史佮地理資訊結合做伙。

聚珍台灣總監 王子碩表示：「倒手爿遮有大東門這个所在開始，對遮路線開始一直行，這个地圖參古早城門城壁的關係，一擺就攏會使佇這張地圖內底看會出來。」

當年有四大城門，到今賰大東門佮大南門爾。廟方講，透過這擺無仝的遶境方式，欲予逐家了解城門的範圍佮位置，嘛回顧建城的歷史，進一步體會城隍信仰所代表的守城精神。