彰化縣平和國小合唱團，今年七月欲代表臺灣去東京參加國際合唱比賽，學校特別邀請捌去外國比賽的大村國小佮新竹桃山國小來交流。有安排台語歌、原住民古調，希望透過歌曲，予聽眾認捌臺灣多元族群的文化，嘛予囡仔人有機會用母語唱歌予世界聽。（新聞標題、導言及內文皆為台語文）
「大庄囡仔，唱出快樂的歌。」
彰化大村國校仔合唱團的學生，唱的這首《大庄囡仔愛唱歌》，是合唱團的自創歌曲，用台語介紹故鄉的特色，2023年閣捌去波蘭表演過。
彰化大村國小合唱團學生：「這改唱的大庄囡仔，是欲共咱（合唱團成立）20年的故事、咱的辛苦，（唱）予逐家聽按呢。」
彰化大村國小合唱團學生：「台語歌唱起來有臺灣土地的故事，閣有臺灣故事的感情。」
彰化大村國小合唱團老師 林義凱：「我會希望囡仔，因為透過咱家己的母語，來熟似咱家己這塊土地所有的文化、所有的特產、所有的一切的風景佮特色；我嘛希望講咱會當（用）咱家己的語言唱予全世界聽。」
彰化市平和國校仔舉辦合唱團交流活動，除了邀請彰化縣的大庄國小，閣有新竹縣的桃山國小，兩間國小的合唱團，攏有去國外比賽的經驗，這遍活動有安排台語歌、閣有排灣族佮泰雅族語古調，希望透過交流，予囡仔認捌臺灣多元族群的文化特色
彰化平和國小排灣族語老師 Kadrui Kunisi：「有教一寡仔排灣族的文化佮原住民的文化，予囡仔人會當閣較了解臺灣的原住民，唱歌的時陣，就會當閣較融入佇這个意境內底。」
新竹桃山國小校長 Yayut Isaw：「三間學校分別代表無仝的族群文化，學生囡仔來遮我相信，會當擴大佇文化教育上，有無仝的觀點；會當學會曉閣較尊重、閣較欣賞臺灣這个島嶼所有多元的文化。」
平和國小表示，怹今年七月欲代表臺灣，去日本東京參加國際合唱比賽，舉辦交流活動，就是欲分享比賽經驗，予愛唱歌的囡仔，攏有機會徛佇世界的舞台，用家己的母語唱歌予逐家聽。
記者 楊舒晴 彰化報導