人講三月迎媽祖，除了有較大規模的大甲媽、白沙屯媽繞境進香，地方嘛有濟濟媽祖繞境活動。北斗(Pó-táu)有一尊三股內媽誠特別，神尊無服侍佇廟內，是36个會員輪流做頭家爐主，逐年媽祖生前後攏會佇庄頭繞境，祈求風調雨順。爐主表示，傳到今上無有兩百年的歷史，是地方誠有代表性的民俗活動。（此則新聞標題、內文為臺語文。）
聽著熱鬧的陣頭聲，民眾徛佇門口手攑清香，等媽祖轎來。臺灣的媽祖信仰真興，各地頭攏有濟濟的媽祖廟，毋過彰化北斗的三股媽真特別，是36个會員輪流做頭家爐主，媽祖就服侍佇爐主厝內，逐年媽祖生前後，嘛會佇庄內繞境祈福。
信眾講：「三股媽伊每一年過去的時陣，阮攏會準備素果，猶閣有敬茶、金銀財寶按呢。」、「求一个逐家平安順序、風調雨順，（三股媽）已經幾若百年矣，逐家攏知影這个三股媽的歷史。」
北勢寮庄是1890年代使用的舊地名，這陣的範圍大概是北斗鎮的西爿、部分的田尾鄉佮埤頭鄉，所以三股媽繞境上遠閣會去田尾的會員兜，爐主表示，三股媽傳到今上無有兩百年的歷史
值年爐主李浤輝講：「36个會員，一戶一戶若跋著爐主伊(三股媽)就去in兜共鎮宅，一直延續落來就是講會員制度，所以咱一代一代延續落來到這陣，已經兩百年以上矣。」
地方文史工作者顏震宇講：「三月痟媽祖自上細个的庄頭，一直到上大全國性，全部攏咧痟。但其實咱毋但是縣抑是一个鎮，抑是講像咱這改是規个北勢寮這个庄頭，咱有家己的信仰。所以有當時仔會使了解咱身邊的庄頭，是毋是仝款有媽祖咧繞境，有媽祖咧做神明生。」
文史工作者指出，臺灣的媽祖，有袂少聯庄佮輪祀信仰，親像雲林的六房媽、臺中新社的九庄媽、彰化枋橋頭七十二庄、同安寮十二庄等等，逐家透過共同的媽祖信仰，互相團結、扶持的過程，攏是誠珍貴的地方文化資產。