臺南德光中學頭擺邀請臺南在地的歌仔戲團入到校園，舉辦歌仔戲特展，閣結合學校的台語課，予學生穿戲服、唱七字仔來認捌這項文化。（新聞標題、導言及內文皆為台語文）
戲班佇台頂一句一句tshuā囡仔唸歌仔戲的七字仔調，閣示範戲中基本的身段、跤步手路，學生學甲真心適。這擺臺南德光中學佇校內人文展示館，邀請在地的鄉城歌仔戲團合作辦特展，欲予學生親身接觸咱臺灣真有代表性的傳統文化。透過戲服、冠、珠仔頭插，閣有珍貴的文獻資料，tshuā逐家認捌歌仔戲的媠。
鄉城歌仔戲劇團團長 楊雅萍：「予怹捌一寡歌仔戲上基本的物件，像跤步手路你佇台仔頂欲按怎比、跤步欲按怎行，其實欲教的物件足濟；閣有像刀槍這攏是上基本的物件。你若戲台仔頂欲好看，遮的物件攏愛知影。」
德光中學校長 楊惠娜：「這馬的囡仔對咱臺灣的文化無啥物了解，所以阮的德光文化基金會今年足特別的，請著鄉城歌仔戲劇團來學校做展覽，來現場介紹抑是一寡文物展，和囡仔所學做一个呼應。」
歌仔戲發源對宜蘭開始，傳到今上百冬，對早期農村以唱歌做議量，演變做外台戲，閣進入廣播、電影、電視媒體，到今發展做文化場咧表演。這擺展覽怹嘛結合校內台語課，老師直接共教學搬入展場，予囡仔實際穿戲服，老師嘛模擬扮仙的情境，成做台語課的活教材。
德光中學學生：「第一改來遮看這展覽，閣會使穿這歌仔戲的衫，我感覺足好耍。」
德光中學台語老師 康順添：「拄仔好上著〈看戲真趣味〉這課，希望台語會當佇囡仔的生活中，會當予怹釘根、會當予怹生湠，所以咱結合這个展覽予怹會當生活化。」
鄉城歌仔戲團團長講，學戲無想的困難，重點是「願意踏出第一步」。怹團成立已經31年，團員攏毋是職業班底，是對戲劇有興趣，利用逐禮拜假日練習、排戲，用行動展現出對文化的熱情。怹表示，未來會繼續湠落去，期待咱的歌仔戲通閣傳承百冬。
記者 李晨宇 臺南報導