慰安婦研究新冊發表 婦援會：歷史毋通放袂記

針對臺灣、韓國、中國慰安婦阿媽，在這本「永不放棄追究日本帝國對慰安婦的責任」，攏有詳細的記錄。佇3月初8婦女節，婦女救援基金會發表這本新冊，這是臺灣頭一本結合四个國家的學者，深入研究80年前二戰時期，日本設置慰安婦制度歷史的冊。

《永不放棄追究日本帝國對慰安婦的責任》總策畫楊孟哲：「過去咱臺灣第一，上𠢕的研究(慰安婦歷史)專家，朱德蘭教授以外，了，咱這馬網路你共查，揣無幾本冊，真少人研究，所以這本冊我就是共大陸(中國)、日本、韓國共加起來攏總有四國，包括東南亞，所有的重要的學術論文，咱攏共創作一本出來。」

這本冊的總策畫楊孟哲教授講，臺灣學術界針對慰安婦歷史的研究真少，希望透過這本冊，集合濟濟慰安婦相關論文，來予學界做研究。婦援會表示，這本冊毋但是對慰安婦阿媽致敬，更加希望予民眾反省歷史。

婦女救援基金會董事葉德蘭：「婦援基金會舉辦一系列的講座，講著烏克蘭、阿富汗、加薩，這寡所在的女性，攏參(慰安婦)阿媽仝款，猶生活佇性別的暴力當中。」

婦援會90年代開始，長期幫助慰安婦阿媽，也記錄𪜶的歷史，計共服務59个慰安婦阿媽，佇2023年，上尾一个阿媽過身，猶是等無日本政府的道歉。婦援會表示，聯合國已經共慰安婦定義做「軍事性奴隸」，凸顯人權侵害性，呼籲日本政府對歷史負責，對這寡慰安婦阿媽會失禮。