臺灣是蘭花王國，世界上超過三份一的蝴蝶蘭，是對臺灣出口。今年臺灣國際蘭展，3/8臺南後壁正式開幕。一連16工的展覽，規畫4大領域、5大場館，超過10團的國外團體來交流，望提升臺灣佇國際市場的能見度。（新聞標題、導言及內文皆為臺語文）
十外萬欉各種色水的蘭花媠噹噹，準備初八迎接各地來的遊客，一年一擺的臺灣國際蘭展準備登場。今年展會規畫4大場域、5大展館，欲予鄉親探索蘭花的多元魅力。閬21冬，亞太蘭花會議嘛結合臺灣國際蘭展聯合舉辦，主辦單位希望透過這場盛會通促進臺灣蘭花產業發展，進一步提升佇國際市場的能見度。
台灣蘭花產銷發展協會秘書長 曾俊弼：「有民眾佮意佮予逐家真關心的品種競賽館，嘛有商務的接待館，閣有蘭花的市集館佮蘭花的生活館。四乘五是二十，今年內底有二十个主題。」
南部天氣燒烙，適合蘭花成長，技術嘛愈來愈進步，全球三份一的蝴蝶蘭攏是來自臺灣，舊年國際市場的蘭花產值就真大。今年展覽嘛特別邀請來自越南、馬來西亞等海外團體鬥陣參與，有各種無仝的文化風俗攏佇遮呈現。
The Federation Of Malaya Orchid Society 陳永強：「阮對馬拉西亞紮來一寡本地的鳥仔岫，閣有阮的地標就是馬來西亞的雙峰塔，嘛有雨林的感覺，所以你會當看著一寡花草。」
中華民國對外貿易發展協會臺南辦事處主任 周秀芬：「舊年的花卉出口總價值兩億美金，這是根據農糧署的統計；毋過蝴蝶蘭佇花卉就佔1.5億美金。」
臺灣國際蘭展到今辦20冬，主辦單位講，會繼續擴展蘭花產業的規模，促進國際交流。除了第一級產業的蘭花品種育種，第二級技術發展，嘛會進一步整合城市觀光模式，透過這个合作平台來參世界連結，嘛提升臺灣蘭花佇全球市場的地位。
記者 李晨宇 臺南採訪報導