下暗變天鋒面到 拜五進前全臺溼冷、北部12度
發布時間：
更新時間：
前幾工仔攏好天，對拜一（3/3）暗時開始，鋒面就會漸漸倚近臺灣；拜二（初4）開始各地頭會感受著溫度直直落。到拜四（初6）受著大陸冷氣團影響，北部地區可能會出現12到14度的低溫，加上到時陣華南雲雨區往東徙，雨水會較厚，全臺灣這禮拜攏會是溼閣冷的天氣。（新聞標題、導言及內文皆為臺語文）
公園內有袂少民眾攏穿短䘼、疊薄外套，拜一全台天氣蓋燒烙，毋過對拜一暗開始，全台攏會變天，氣象署表示，拜一暗到拜三受著鋒面的影響，中部以北佮宜蘭花蓮會有明顯的強陣雨，拜四、拜五因為華南雲雨區往東爿徙，全台攏是澹漉漉的天氣。
氣象署預報員 陳姵安：「到3/5日時拄才講著，受著華南雲雨區東徙的影響，所以累積的降雨也是會較濟一寡，而且降雨區域也是較濟。毋過雷公雨發生的現象，可能機率就會降低矣，一直攏是以短暫雨為主，會一直維持到3/6、3/7，也就是拜五（3/7）進前，佇水氣方面攏會較厚。」
氣象署表示到拜三進前受著東北季風影響，溫度會沓沓仔降低，對拜四開始一路到禮拜因為大陸冷氣團落南，氣溫會降閣較低，北部有可能會出現12度到14度的低溫，上低溫可能會出現佇拜五透早。
氣象署預報員 陳姵安：「對拜四開始一直到3/9透早，其實規工攏會是較冷的天氣型態；上低溫預估是佇3/7透早，佇北部地區可能是干焦12到14度左右的低溫，所以愛請逐家特別注意天氣變化。預估3/9過了，規个臺灣地區攏會沓沓仔回溫。」
氣象署講，未來一禮拜全台攏會是澹冷的天氣，拜三進前對流明顯，天氣較無穩定，較gâu有強陣風、強陣雨，也有可能會霆春雷，抑若拜一、拜二這兩工，金門、馬祖閣有中部地區可能會罩霧，氣象署提醒民眾行車愛特別注意安全。
記者 張佳倪 林郁凱 臺北報導
唐嘉良/編輯
