文化部培育台語家庭計畫，各縣市攏推出精彩的台語相關活動，嘛予台語成做討論度真懸的議題，新竹市本土語推廣協會透過生活應用、熟似食物、台語戲劇等方式，吸引袂少民眾𤆬囡仔做伙來參與，就連香港朋友嘛來報名學台語。（這則新聞標題、前言、內文為臺語文。）
「白翎鷥，是按怎你哪會遮爾仔瘦，我哪有可能袂瘦。」
逐家做伙用台語搬戲，逐个人攏耍甲真歡喜，嘛對𨑨迌的過程中學台語、講台語，趣味的活動連香港朋友攏專工來報名，𪜶講台語是臺灣足重要的語言，想欲熟似臺灣文化，學台語是第一步。
香港民眾：「台語是臺灣家己的語言，但是阮對香港來，就毋知影台語按怎講，阮足希望去學台語，了解臺灣的文化。」
香港民眾：「我來臺灣大概三個月，聽著足濟人攏講台語，所以我想欲加學一个語言，會當閣較融入臺灣。」
現場閣有國小老師也來學台語，嘛對文化部提出台語家庭計畫，表示肯定。
國小老師：「真好，因為我知影講計畫是厝內的大人，就是爸爸媽媽佮較細漢的囡仔，攏愛加入這个計畫，逐家攏愛抾點，毋是爸爸媽媽抾點就會使，逐家會使練習台語，這是咱的母語。」
新竹本土語推廣協會理事長翁靖宜：「台語本底就是生活的語言，咱希望𤆬領咱的學員，會使用足搭近生活，咱去菜市仔、去𥴊仔店、咱去利便店仔，就會使看著的物件，予伊知影講原來台語是按呢講
所以嘛鼓勵學員、大人𤆬囡仔，同齊佇生活中開始講台語。」
文化部推出母語家庭計畫，參加活動提點數就會當換獎勵金，第一期活動到月底結束，新竹本土語言協會講透過培育台語家庭計畫，除了予囡仔自然學習使用台語、延續母語文化，共台語𤆬入厝內成做生活當中習慣的語言，予母語一代湠一代，繼續傳落去。