西班牙藝術家破壞士林慈諴宮廟門 判罰1.5萬

臺北市市定古蹟-士林慈諴宮的廟門，門神的漆面有一部份落漆去，通看著廟門柴頭的原色。士林慈諴宮龍爿的廟門，2023年8月，予一个西班牙籍姓方的查埔人，提鑢仔佮布，搵松香水(siông-hiang-tsuí)這寡化學品鑢廟門，鑢甲落漆，士林地檢署認定涉嫌毀損罪，提起公訴，這幾工士林地院判決，共這个查埔人罰15000箍，目前猶通上訴。

民眾鄭小姐講：「伊無尊重媽祖婆，無好、無好。伊嘛是有啉酒啦。」

士林慈諴宮工作人員邱先生講：「原本遮爾媠的物件，無緣無故就因為外國人毋捌，毋知影咱門神的重要，門神就代表門面，這馬就是緊急修復的報告書有出去矣。」

士林慈諴宮，閣號做士林媽祖廟，是士林三大古廟之一，創建佇1796年，1864年搬到這馬的地點，到今超過200年歷史，是臺北市市定古蹟。2023年廟門予人破壞到今，猶未修復，臺北市文化局指出，廟方已經提出相關的修復程序，猶咧協調廟方、佮藝師的時間來修復，和相關細節。

臺北市文化局專門委員邱稚亘講：「修復的計畫阮也審查通過，阮就是會佮廟方遮確認講，到底修復的時程大概是啥物時陣，阮佇過程中也會邀請文資委員到現場去確認，就是相關的工法、工序，佮進前阮審查通過的計畫是毋是相仝。」

針對士林地院目前的判決，文化局表示，廟方是當咧討論敢有欲繼續上訴。為著避免廟門閣再予人破壞，廟方已經佇廟門附近圍紅線起來，也有加強巡邏。