網路交朋友愛細膩 愛情騙子跋感情拐錢財
發布時間：
更新時間：
今仔日（14）是西洋情人節，提醒民眾，佇網路交朋友愛特別注意愛情的騙子。彰化縣警察局公佈，今年一月就受理588件詐騙案，財物損失加起來欲3億，其中閣以假影交朋友佮騙錢投資的詐騙上濟。（新聞標題、導言及內文皆為臺語文）
警察佮受騙民眾：「伊佇阿富汗做醫師，政府有予伊百五萬美金的退休金。」
超商內底這位民眾準備欲買五萬箍的點數卡，經過警察的解說，才知影是拄著愛情的騙子，彰化莿桐派出所日前接著超商報案疑似有詐騙，原來是有民眾佇網路熟似一位女子，講家己佇國外做醫生，兩人佇網路開始聯絡開講，落尾這位網友就以各種理由，要求民眾去超商買點數提供予伊。
彰化縣警分局長 林英煌：「最近成功阻擋兩件詐騙案件，詐騙方式攏參假影交朋有關係。歹徒會利用社群平台佮交朋友的軟體，佮被害人培養感情，落尾就會開始騙錢財。」
彰化警察局執行今年1月的詐騙查緝專案，掠著28件的詐騙案、161个詐欺犯，查扣汽車、土地、現金等等，計共4,065萬，嘛成功阻擋4,662萬的詐騙金，警察局表示，詐騙集團的步數千萬招，其中閣以跋感情、騙錢財的詐騙上濟。
彰化縣警察局長 陳明君：「佇假投資的詐騙猶是較嚴重的，1月的假投資財損金額有2億3千4百外萬；孤一件詐騙金額超過1百萬的，嘛有68件。關於假愛情詐騙的查緝，阮嘛會閣再加強。」
彰化警察局表示，捷看著的網路愛情騙子，攏會先開講關心、盤撋跋感情，落尾就會開始要求匯款、幫忙收貨物等等，提醒民眾若拄著遮的情形，真有可能是詐騙集團設的陷阱，一定愛提懸警覺。
記者 楊舒晴 彰化報導
唐嘉良/編輯
