鹽水蜂炮元宵起鼓 今年超過250座炮城大場面
發布時間：
更新時間：
今年元宵的臺南鹹水蜂仔炮，這個月11、12欲開始。超過250座的炮城，規模並往過較大。鹽水武廟也提醒民眾，若是欲體驗犁蜂炮，一定愛包好勢，避免著傷。（新聞標題、導言及內文皆為臺語文）
上萬支的蜂仔炮同時發射咻咻叫，逐冬攏唌足濟民眾來參與犁炮，這是予人列做世界三大民俗慶典之一的臺南鹽水放蜂仔炮文化，今年2月12起鼓，廟方按算炮城會增加、規模嘛會並往年加較大，另外廟方今年嘛頭改打造沉浸式的蜂仔炮體驗空間，欲予遊客來感受這款刺激感。
民眾：「足媠啊！因為我嘛毋捌參加放蜂仔炮，今年會過來看覓咧。」
鹽水武廟主委 翁再進：「所有來參加的炮城已經登記，上少會超過舊年的規模，會愈來愈大，差不多超過250座以上矣，所以真有好看頭。」
這馬鹽水地區大街小巷攏通看著逐家當咧組炮城，有廟是太子爺造型來做設計，在地人講今年定咧地動這回炮城嘛加疊較懸，就希望祈求規年迵天攏平安順序。
店家 張哲嘉：「今年大岫會縛較懸，是因為逐家講因為今年天災傷濟，所以縛較大岫，祈求天災會使較少咧按呢。」
龍護宮主委 王志中：「這个（太子爺炮城）會疊佇這座頂懸，所以疊起來將近兩層樓懸。（你用偌少蜂仔炮） 用十外萬。」
廟方講，鹽水蜂炮民俗對有瘟疫彼陣就開始，到今兩百外冬的歷史，參與民俗活動雖然心適毋過安全嘛愛注意，根據統計舊年就有六个人著傷，消防局嘛特別呼籲鄉親愛全副武裝，離炮城愛有五公尺遠，安全上重要。
記者 李晨宇 臺南報導
唐嘉良/編輯
