彰化鹿港天后宮送神筅黗 感謝神明透年保庇
發布時間：
更新時間：
舊曆12/24是送神的日子，彰化鹿港天后宮就來準備牲醴、果子，叩謝神恩、答謝神祇。出動上百位志工來鬥筅黗，替神尊換新衫，感謝神明這一年的保庇。（新聞標題、導言及內文皆為臺語文）
志工用筅仔共媽祖婆神尊的坱埃摒予清氣，舊曆12月24是臺灣民間習俗內底，送神、筅黗的日子，國定古蹟鹿港天后宮出動成百位志工，來共廟內的環境摒摒咧，尤其咧整理神尊愛特別細膩佮斟酌，因為鹿港天后宮的媽祖婆攏有上百年的歷史。
鹿港天后宮委員 林志坤：「佇神房內面的神尊攏是上百年的神尊，所以咱咧整理的時陣愛足輕的，無會去破壞著神尊的漆線。」
鹿港天后宮執行總幹事 劉家汶：「今仔就是咱民間講的，送神的日子。廟內來筅黗謝太歲佮謝斗母，感謝（神明）規年迵天共咱保佑，予咱一家大細攏會當平安順序。」
除了廟方會準備牲醴果子，謝太歲、謝斗母，一般人家厝也會送神筅黗，若有佇厝內安太歲的民眾，嘛會佇送神拆金的時陣，共貼佇廳頭的太歲符做伙化掉，答謝今年太歲星君的庇佑，然後過舊曆新正的時才閣供奉值年的太歲符。
民眾：「會準備壽金佮甲馬。甲馬就是神明咧坐的馬，予（神明）轉天庭的時陣會用得坐甲馬；閣有咱太歲符提落來的時陣會順紲化掉；了後就會使開始筅黗。」
一般12/24筅黗這工，送神分做送灶神佮送眾神，各地頭也有無仝的風俗，但是對送神拜拜到筅黗摒掃環境，攏會當看出臺灣民間風俗，敬天謝神的心意，嘛趁過年前大摒掃，欲共歹運摒掉，迎接新正的好彩頭。
記者 楊舒晴 彰化報導
唐嘉良/編輯
