行政院核定國家語言整體發展方案，按算2026年欲達成台語家庭4萬戶的目標。文化部11月底也正式推捒「台語家庭計劃」，家庭成員會當透過申請參加課程活動、累積點數，上尾會有獎勵金。學者佮民間團體攏認為，台語家庭計畫用鼓勵的方式來引導民眾學台語，而且以家庭做起，對提升母語意識應該真有幫助。（此則新聞標題、導言、內文皆為臺語文。）
爸母陪伴佇囡仔邊仔做伙讀台語繪本，這幾年毋管是政府抑是民間，有舉辦那來那濟台語課程佮活動。抑若文化部佇11月底也推出「台語家庭計劃」，鼓勵閣較濟家庭來參與，民眾會當佇網站註冊，透過參加臺語課程、活動累積點數，就會當成做台語家庭，上尾會有500箍到1800箍的獎勵金。
學者表示，這改的計畫以家庭做單位是真好的起點，因為對囡仔來講，熟似世界上主要攏是透過厝內底的人互相交流。這个計畫共台語家庭分做兩類，若是民眾無一定會曉講、毋過想欲重新學台語，就屬於「台語學習家庭」；抑若平常時有實際用台語溝通，就屬於「台語文化家庭」。民眾會當根據家庭分類，選擇適合家己的課程活動來學習。
民間團體表示，兩个人就會使成立台語家庭的申請，是真好入門。學者認為，台語家庭計畫用鼓勵的方式，共一寡少年爸母相招入來，做伙學習台語，對提升母語意識是真有幫助。
記者 張佳倪 謝季潾 臺北報導