「臺灣隊」名聲愈來愈響 民團呼籲趁機會正名

民眾真關注世界12強棒球賽，咱代表隊隊長陳傑憲佇冠軍賽摃出三分homerun了後，佇胸坎比一个四角形的手勢，伊講這是代表臺灣的意思。就有民間團體講，這擺的比賽毋但國內濟濟民眾攏叫咱家己臺灣隊，國外也有媒體用臺灣隊這个名。民團主張咱應該推動正名，予咱的代表隊佇未來的賽事，通用「臺灣隊」這个名出國比賽。

雖然咱參賽隊名是用「Chinese Taipei中華臺北」，毋過對球員、球迷，到濟濟國內外媒體，攏是叫咱「臺灣隊」。有民間團體認為，這馬臺灣民間佮國際社會對叫咱「臺灣」這个名已經有意識，應該趁這个機會推捒正名。台灣社前社長李川信表示：「國內也好、國際也好，其實過去對『臺灣』無遐重視，經過這幾年來，咱臺灣的名聲佇咧世界上有名，逐家攏稱呼咱『臺灣』。」

2018年的時，前田徑國手紀政發起公投，希望咱通以「臺灣」這个名申請參加2020東京奧運，落尾公投無通過，其中就是有包括運動員佮民眾煩惱，用「臺灣」申請比賽，會致使咱的參賽權予中國打壓。有民眾表示：「變成『臺灣隊』可能就變成有進一步突破，感覺會引起一寡中國的不滿，感覺有好有䆀。」而台灣社前社長李川信則表示：「任何國家攏對中國的獨裁真反感，所以咱其實會使藉這寡珍惜民主的國家，共同來對中國有一寡抗議。咱相信國內先做起，才有法度真正改做『臺灣』。」

民間團體講，臺灣隊正名會使民間、政府做伙捒。民間對改變口語、書寫慣勢開始，正名臺灣隊；政府也通透過外交系統，對理念相仝的國家開始，推捒「臺灣」這个名。但是民眾也煩惱，這寡行動會刺激中國，就可能需要政府激頭殼斟酌計畫，一步一步來推捒。