第12屆徐生明盃少棒賽 龜山國小11:7提冠軍

來自桃園的龜山國小少棒隊，對戰韓國首爾隊，欲來拚第12屆徐生明少棒盃的冠軍，龜山少棒隊的總教練表示，今年有袂少實力堅強的球隊參加，一路拍入冠軍賽真無簡單。

桃園龜山國小少棒隊總教練陳明宏表示：「這改外國隊的實力原仔比阮較好一寡，因為in組隊的方式佮阮無仝款，是俱樂部，無就足濟學校組起來，所以佮in拍無遐爾簡單拍。」

桃園龜山國小少棒隊球員林冠嶔講:「棒球就是愛逐家合作，只有合作才有法度提著冠軍。」

最後桃園龜山國小，以11比7的分數提著冠軍，完成二連霸的挑戰，頭擺參加徐生明少棒盃的首爾隊就講，臺灣球隊的基本工夫誠在，是真值得尊敬的對手。

韓國首爾少棒隊總教練李永國表示：「臺灣的選手雖然有的無講大欉，但是逐家的基本工夫攏真在，代表選手自細漢的訓練做甲真好，所以一路拍入決賽其實是真辛苦的。」

韓國首爾少棒隊球員石陞浩講:「阮是頭一擺參加，雖然臺灣的天氣真熱，但是因為逐家攏足團結的，有隊員的拍拚才有法度進入決賽。」

徐生明棒球發展協會表示，辦比賽最主要就是欲予學生選手粒積經驗，佮國際交流，但是欲捒青少棒活動，揣經費是上大的挑戰。

徐生明棒球發展協會理事長謝榮瑤講:「基層的棒球這塊，你若欲培養好的人才，包括囡仔人，你欲予伊拍到職棒，各方面來講資金就是上大的問題，贊助金是上大的問題。」

這陣臺灣棒球提著世界冠軍，棒球成做逐家討論的話題，主辦單位嘛向望有閣較濟人，做伙來關心台灣基層棒球的發展，予佮意運動的囡仔有發揮的舞台。