嘉義老人占22.8%全國上濟 民團募長照專車

嘉義縣老人人口比例是22.88%，是全台灣比例上懸的所在。全嘉義縣有66台長照專車服務長輩，毋過猶是無夠，而且也有專車已輕到十年的年限，嘉義有團體募款買新車，捐予嘉義縣天主教、安道基金會，向望照顧長輩的服務，袂受著影響。


坐佇輪椅行動無方便的長輩，欲出外坐車的時陣，攏需要照顧人員佮專門的車輛來協助，但是這種長照專車，使用的年限上濟就是十冬，為著欲協助嘉義縣天主教安道基金會繼續服務長輩，嘉義獅子會就專門來提供協助。

嘉義縣天主教安道基金會執行長吳敏華表示，考慮著所有長輩坐車的安全性，所以這台車是替換咱已經滿十冬的車，咱講的獅子會、猶是扶輪社，in若願意來捐車對咱嘉義縣，規个失能失智的長輩來講，彼是會當提供足好的服務。」


安道基金會表示，in對2012年開始承辦嘉義縣長照專車的接送，負責☒失智失能的長輩看醫生，抑是參加活動，基金會有四台車，平均一年走山區佮海線接送，就超過4000逝，毋閣因為路途的關係，有時陣猶是有長輩無法度坐著車。

嘉義縣天主教安道基金會執行長吳敏華閣講，「今年對正月到九月來講，有701通電話是in需要服務，毋閣阮無法度來提供，因為咱車輛攏已經滇矣。」

嘉義縣社會局副局長戴綵屏表示，除了復康巴士以外，in嘛會揣一寡計程車行，in會合作提供 配合長照基金、提供咱老大人這款的長照服務。

嘉義縣社會局表示，嘉義縣所在闊，偏鄉的老人欲來到市區，攏需要長照專車，目前縣內有22个單位，計共66台車提供服務，除了安道基金會，嘛有一寡單位的車輛欲到使用的年限，會繼續來走揣資源來換新車，沓沓仔提升接送的車次佮範圍。