最近佇咧國際上針對2758號決議無牽涉臺灣的討論有真濟，而且頂禮拜咧雙十大典，總統賴清德對兩岸關係的論述，嘛真受外界關注，辜寬敏基金會今仔日發佈「2024國家無正常關鍵報告」，毋若呼籲總統重視臺灣正名的重要性，報告當中嘛指出像路名中國化、奧運用CHINESE TAIPEI參賽等等問題，對臺灣的影響。（此則新聞標題、導言、內文皆為臺語文。）
頂禮拜雙十大典，總統賴清德強調，中華民國佮中國互相無隸屬，毋過堅持倡議國家正常化的辜寬敏基金會指出，這陣國際當透過2758號決議無牽涉臺灣咧支持咱國，in認為政府應當積極面對臺灣正名，佇咧10/15發佈2024國家無正常關鍵報告，指出濟濟問題和建議。
辜寬敏基金會董事長王美琇講：「偉大的政治家應當是想盡辦法共伊的理想放上大，毋是共家己理想信念目標冷卻冰凍起來，然後往含糊的中央倚過去，這行久來有時陣會揣無路，甚至會予咱國民掠袂定。」
基金會招濟濟專家、學者共同編寫這份「國家無正常關鍵報告」，學者指出比論中正路、上海路等等，濟濟威權性和中國化的地名應當改掉，予路名通佮臺灣有閣較密切的關聯。另外咱國久年來直直以Chinese Taipei的名參加奧運，前行政院體育委員會主委認為這會予國際愈無了解臺灣佮中國的差別。
台灣教授協會副會長陳月妙講：「威權的人中正路、中山路、經國路你逐家有看著這，干焦中正路全臺灣滿島有311處，希望遮的無正義、扭曲的歷史會當歸正。」
前行政院體育委員會主任委員楊忠和講：「奧運憲章內底有規定，你參加的這个國家你愛用你國家的名，猶若無就是你愛代表你地區名稱，咱中國臺北地圖內底攏無，中國臺北是代表啥物貨？這就是足無正常的一件代誌。」
辜寬敏基金會表示，未來逐年in攏會發佈報告，針對遮的問題政府敢有改善去檢討，另外嘛按算結合網路發起社會對話，甚至按算繼續推動奧運正名等等，向望透過遮的行動，通促進愈濟臺灣民眾關注國家正常化的議題。