東港迎王明日起鼓 1600斤烏魚子疊出雙龍
發布時間：
更新時間：
屏東東港3年1科的「迎王平安祭典」，明仔載（28）就欲起鼓囉。今年祭典頭擺用海產來製作雙龍雙鳳的裝置，其中龍的鱗是用烏魚子疊起來；鳳凰是用鰇魚做羽毛。現場烏魚子就用千外斤。祭典大總理表示，迎王祭典結束了後，就會共烏魚子佮鰇魚攏分予信眾，絕對袂浪費遮的食物。（新聞標題、導言及內文皆為臺語文）
東港的河堤公園邊仔，民眾佇街仔路徛規排，逐家攏提手機仔咧翕這對龍鳳，這毋是普通的祭典裝置爾，詳細看疊佇這隻龍身軀的鱗，是一片一片的烏魚子，連人徛佇街路對面攏會當鼻著烏魚子的芳味，民眾攏講有影是誠壯觀。
民眾：「（往過）伊攏搭一个牌樓爾爾，無像這擺用龍鳳按呢，聽講遮的烏魚子開了百幾萬，真正足媠。」
大總理 鄭春忠：「今年拄好甲辰年、龍年矣，龍年本底欲做兩尾龍，到尾出桮愛兩隻鳳。用烏魚子做龍的鱗；薑是阮做頭路愛有人客叫江山。」
祭典大總理表示，這兩對龍鳳，工人開三工時間才完成，計共用1600斤的烏魚子，貼佇鳳凰身軀的鰇魚也有500斤，這嘛是東港迎王平安祭典，頭擺下重本，出現遮爾仔顯目的裝置，毋過有人質疑講，按呢敢會傷過無彩，祭典過後烏魚子敢會變質，就按呢討債去，廟方講怹事前有做實驗。
大總理助理 蘇進福：「用無包紙的較安全，雨來雨沃、日來日曝，過一段時間，超過成十工猶會食，阮攏試過矣，鹽度差不多攏30度以上。」
大總理 鄭春忠：「這嘛是予工作人員逐家分分提去食，這算是神佛的物件。」
為期8工7暝的迎王祭典28就起鼓囉，東港河堤公園邊這對雙龍雙鳳，毋但唌人目，閣替祭典增加袂少話題。
記者 邱紹揚 屏東報導
唐嘉良/編輯
