陽明交通大學有一个學生，頂禮拜暗時佇學校搪著一个外口入來的查埔人，講家己是黑道、目前佇附近進行交易，因為欠錢、開喙向學生借錢，學生因為驚有安全的問題最後予對方九萬箍，後來才知影全台灣，已經有8个學生搪著嫌犯，其中有四个學生借錢予對方，當然這款借錢是有去無回。
陽明交通大學有一个學生，頂禮拜暗時佇學校搪著一个外口入來的查埔人，講家己是黑道、目前佇附近進行交易，因為欠錢、開喙向學生借錢，學生因為驚有安全的問題、最後予對方九萬箍，後來才知影全台灣，已經有8个學生搪著嫌犯，其中有四个學生借錢予對方，當然這款借錢是有去無回。
三更半暝新竹陽明交通大學內面出現一个四界借錢的查埔人，而且閣刁工揣校園較暗的所在，向學生講家己是黑道，學生因為驚會有安全問題，照對方的意思，借伊九萬現金。
受害學生：「嫌犯是對這个所在過來的，然後就那行那擛手講，同學會當鬥相共無，然後向我借9萬箍，拄開始我當然是拒絕，毋過後來對方講家己，佇臺南真有勢力，幫忙處理過真濟代誌。」
學生後來共事件經過寫佇網路頂懸，才發現原來毋但家己一个被害者，連清華大學閣有基隆以及台中的大學，攏傳出有仝款的代誌。
清大受害學生表示，「（目前知影大概有偌濟人)應該四、五个人，（敢攏是仝款的手法)，著 然後攏是8萬箍到10萬箍的金額。」
警方表示目前已經調出監視器清查身分，準備掠出嫌犯釐清相關案情。
埔頂派出所所長楊志強表示，「受理報案了後，連鞭派人調閱附近的監視器，清查行為人的身分，來釐清案件真相。」
學校方面嘛緊急寄email提醒學生，若是搪著生分人借錢，第一時間愛保持冷靜，趕緊揣學校人員協助處理，另外嘛會派人巡邏加強校園的安全。