巴黎文化奧運 妮妃雅展現咱文化、大聲喝「臺灣」

佇法國的文化奧運，咱的台灣館，有咱台灣的變裝皇后-妮妃雅，配合台灣的影像演出，佇現場大聲喝出台灣這2字。另外，臺北木偶劇團也佇現場搬布袋戲。另外流行歌曲、也有DJ共台灣和法國的歌曲融合作伙，用文化和世界各國的人交朋友。

招牌弓蕉黃的服裝、影目的造型，裝做一隻大蝶仔，伊是台灣出名的變裝皇后妮妃雅。文化奧運台灣館，妮妃雅用變裝藝術、搭配來自台灣的影像，予國外民眾熟似台灣，而且大聲喝出台灣的名。妮妃雅講：「感覺好無？ (有)有感受著虹佮同志無？ (有)」、「我知影愛講Chinese Taipei，但是用我的話來講就是臺灣。」

喝出台灣，台跤的濟濟民眾也大聲歡呼；文化部表示，文化奧運台灣館上濟通入來千五人，妮妃雅的高人氣，予規个場地攏人𤲍人。

仝款共台灣文化tshuā到巴黎的，閣有臺北木偶劇團，in的布袋戲齣，描寫一个美麗島嶼的西爿，有惡龍厝邊、想欲佔領島嶼，島民起身對抗的故事。

駐法國臺灣文化中心主任胡晴舫講：「伊(文化)對傳統成長出來，但是伊一直創新，伊面對這个時代、參世界對話，所以這个物件毋是只有臺灣人佮意是世界的觀眾攏通欣賞。」

「有一工想起我 ，妳目屎輾輾滴。我是被誤解誤解的釘子花(燈仔花)。」

臺灣出名歌手伍佰的歌曲「釘子花」，也予DJ林貓王，搭配法國歌曲，佇臺灣館放送，台跤各國的觀眾也綴咧跳舞。

臺灣DJ林貓王講：「我想欲予踮巴黎的臺灣人，抑是踮巴黎的外國人、巴黎人，攏會使感受著我帶來的音樂，所以我融合法國佮臺灣的元素做伙，我知影法國人真佮意Daft Punk這種真Disco的音樂，我就想講臺灣有啥物Disco的音樂，像伍佰就非常Disco。」

林貓王講，台灣佮法國仝款，攏是誠自由的所在，伊透過放送兩國多元風格的歌曲，希望用文化、用音樂互相交流、予文化奧運臺灣館袂輸一个大型的搖滾PARTY現場。