全台頭一座以聲音為主的博物館就佇屏東恆春，共恆春半島的千言萬語攏轉換做聲音，透過聲音紀錄傳統的恆春民謠、排灣古調，𤆬逐家熟似恆春的人文歷史。（此則新聞標題、導言、內文皆為臺語文。）
「落山風民謠，半島就剾起落山風」
這條歌唱出落山風佮恆春的連結，透過這个機器，民眾會當家己選歌，內面有濟濟民謠，攏唱出恆春半島的特色文化，恆春民謠已經有百外冬的歷史，這棟位佇恆春的聲音博物館，團隊開一年的時間，佇恆春半島調查佮收集聲音，對枋山到滿州，共恆春半島的故事，用聲音呈現出來，民謠對恆春人來講，是上重要的傳統記持。
恆春民謠促進會理事長林瓊瑤，「(居民)咧唱的時閣做這工課，就會感覺較輕鬆，所以民謠是阮恆春半島，足濟人生活的一部。」
民眾，「佇無仝款的所在，你會聽著無仝款的自然聲，佮人的聲按呢。」
聲音博物館的展場，是以恆春在地，包括古城佮民謠月琴的特色為主，採集恆春半島的自然環境、生活、音樂藝術佮在地的連結，紀錄恆春的人文地景，除了民謠，閣有排灣族的古謠、古物，予民眾毋但用目睭觀賞，閣會當用耳空聽，感受在地的風情。
屏東縣政府文化處處長吳明榮，「恆春半島應該是上有彼个條件，做這个聲音博物館，上主要是因為阮希望講，共阿媽阿公唱民謠的聲音留落來。」
恆春民謠館六月才啟用，嘛成做全台頭一座的聲音博物館，除了博物館，二樓是規劃做圖書館，濟濟有關恆春半島的歷史故事，予民眾會當體會著恆春民謠這項無形文化資產的重要性。