南海熱帶低氣壓 結做今年第2粒風颱「馬力斯」

拜五透早北部的民眾出門天氣袂䆀。毋過中南部因為吹南風，所以猶是略仔落雨。毋過拜五下晡開始因為鋒面接近，全台開始透風落雨，氣象署講這波鋒面會繼續影響到拜六、禮拜的天氣。

氣象署預報員朱美霖：「拜六熱帶系統漸漸合併入低壓帶，鋒面的系統會漸漸徙到臺灣天頂，按呢生 鋒面加上低壓的影響，會予拜六的天氣環境變甲愈無穩定，毋過上明顯的雨水，會落佇拜六暗佮禮拜日規工。」

氣象署表示，拜六、禮拜，天氣除了受鋒面影響，風颱嘛來鬥熱鬧，因為南海頂頭有一个熱帶性低氣壓，拜五下晡2點已經變做輕度風颱--馬力斯(Maliksi)，預測往中國廣東方向徙，拜六、禮拜會佮鋒面同齊影響臺灣的天氣，假日兩工全台攏會落大雨。

氣象署預報員朱美霖，「伊佇南爿、西南風偏強，帶來較溫暖較溼的空氣，大量的水氣積佇這个低氣壓，綴伊低氣壓漸漸徙到華南附近，佮梅雨鋒面敆做伙了後，所以伊其實是對梅雨鋒面，帶來真厚的西南風的水氣。」

溫度的部分，今仔全台各地高溫是29到32度，感覺燒熱，但是拜六開始因為鋒面加上東北風，各地溫度會降到28度以下，北部地區會降到21到25度，預計後禮拜二才會回溫，溫度變化大民眾要注意保暖。