新冠死亡9成無注XBB 今開放滿65歲注第2劑
發布時間：
更新時間：
根據統計，國內新冠病毒重症佮死亡個案有9成以上攏無注XBB疫苗。衛福部宣佈對4/9開始開放65歲以上的序大注第二筒XBB疫苗。另外，腸病毒疫情也當咧夯，5月可能湠甲誠嚴重，提醒家長愛注意囡仔，若準愛睏、無精神、跤手無力，要趕緊紮去予醫生看。（此則新聞標題、導言、內文皆為臺語文。）
疾管署揣來80歲的台灣女演員王滿嬌，來宣傳，呼籲序大來注第2筒Covid-19XBB疫苗。疾管署表示，國內Covid-19，重症和死亡的個案，9成攏無注過XBB疫苗；尤其是死亡的案件，有九成攏是65歲以上序大、所以初九開始，65歲以上序大、免疫力低等等民眾，通注第二筒XBB疫苗。
衛福部傳染病防治諮詢會預防接種組召集人 李秉穎，「咱是隨時看狀況來修正咱的建議，主要猶是看最近重症佮死亡案例，ﰀ的人口結構特徵是按怎，若是咱有加的疫苗，當然咱會使考慮，擴大注疫苗的族群。」
除了Covid-19，疾管署統計指出，頂禮拜、因為腸病毒去病院、攏總有7517人次，是同期十年以來上懸。疾管署呼籲家長愛特別注意。
衛福部疾管署發言人 曾淑慧，「腸病毒重症前的症頭包括，有活動力無好、意識無清楚、愛睏等等，若是家長抑是民眾，有發見這寡腸病毒重症前的症頭，愛趕緊送囡仔去病院，減少重症。」
疾管署估計，四月底腸病毒會進入流行期，五月底的時，會達到疫情的高峰，提醒家長和囡仔，要常常洗手，加強防護。
洪家馨/編輯
