攝影大師張照堂昨昏過身，食到81歲。伊是台灣非常重要的影像創作者，無論是靜態攝影、翕紀錄片、劇情片，攏有真懸的成就。伊自1968年開始，以台灣本土文化為主拍紀錄片，透過影像，對當代的社會現象和處境，提出觀點和關懷。因為感念張照堂的付出，文化部表示，會請總統明令褒揚。（這條新聞導言、標題、內文是台語文。）
影像工作者 張照堂(2014.01.24)：「我翕的，一般大部份是街路的角仔啦、人的生活啦、人的模樣，彼叫做社會風景。心理風景其實，是較成對我遮出發看出去的世界、看出去的人。」
張照堂一生從事影像創作，無論是靜態攝影，拍紀錄片、劇情片，攏創作出獨特風格的作品，捌提過國家文藝獎、金馬獎終身成就獎。張照堂自1968年進去電視台做攝影，開始拍紀錄片，他的鏡頭對準台灣本土文化，"大甲媽祖回娘家"、"古厝"、"王船祭典"是他早期真出名的作品。
影像工作者 張照堂(2014.01.24)：「當然入去到電視台做工課以後，你才會看著真濟社會的問題、人的問題，遐的物件才會予你思考真正人的模樣是怎樣。」
張照堂1943年佇板橋出世，台大土木系畢業，不過對攝影有真大的興趣，捌佇中視、公視、和超視等等食過頭路，製作袂少關懷弱勢的節目，也予伊深入思考濟濟社會問題。濟濟導演親像黃信堯、曹文傑攏是伊的徒弟，曹文傑表示老師是一个對作品誠頂真、嚴肅的人，毋過伊總是予伊的學生上大的支持和鼓勵。
紀錄片導演 曹文傑：「紀錄片長期以來一直有一个傳統，就是為弱勢者發聲。只要這个題材做落去以後，是對規个社會抑是對弱勢者有幫助的，攏會予阮上大的支持，予阮去發揮阮的專長。對我來講，對阮來講，就是失去老爸矣。」
張照堂老師佇4月初2過世，食到81歲。為著感念張照堂的貢獻，文化部表示欲請總統明令褒揚。曹文傑嘛希望有一工會當共張照堂往過的作品重新囥起去到網路，繼續啟發濟濟創作者。