臺南和勝堂王獻大典 閬36冬王船閣出廠踅境

水沿路滴、當咧開水路，頭前有家將團咧護持，雙爿兼有民眾鬥搝索，搝的就是這隻24尺長的王船。大部分的王船便若出廠就準備欲燒化，不而過這擺臺南和勝堂一紀年才一科的王獻大典，是閬36冬王船開光了後，閣出廠踅境七公里，這嘛形成府城舊城區真罕見的景象。廟方講，主要是12瘟王佇疫情尾聲欲來消災解厄，嘛唌真濟民眾來搝王船求平安。

民眾，「我是對頭前一直逐、逐到遮的，傳承啦ﰀ這間攏無斷過，因為別間有斷過、你若斷過一改，講較白的就是無機會閣繼續後一改。」

民眾，「綴囡仔行行咧好耍，袂啦，歡喜就袂忝。」

和勝堂管理委員會特助吳尚穎，「王船出來受咱民眾來朝拜，王船會來賜福共遮無形的嘛收轉去。」

這个代天巡狩的王船寶艦是由傳統工藝保存者王明賢，用三個月時間完成的，全部攏是照寸步、用紙糊的，嘛展現真濟糊紙工藝的風采。文史工作者指出，無論是獅頭、龍抑是鳳等神獸，看起來毋干焦立體爾，這嘛予王船閣較神聖。

文史工作者周志明，「這兩尾雙龍的部份，其實攏是用手工落去捏的，你若看著船邊有一寡較細尾的龍，講實在伊是用一般便的，遮的紙落去敆的，最近這幾冬欲看著講，船會當用手工捏遮的龍的部份，這隻船咱可能會當好好仔欣賞。」

大典的重頭戲送王儀式，按算四月初六佇三鯤鯓舉辦。廟方表示，王獻大典對1940年到今拚勢傳承，從來毋捌斷過。這回廟方除了出版廟誌共文化的點點滴滴紀錄落來，嘛向市府申請市定民俗，希望共地方民俗發揚光大、推向國際去。