行政院列做不義遺址 陳建仁親身掛牌標示

政治受難者、佮家屬，下晡來到國家人權博物館景美園區啟用「不義遺址標示系統」，文化部為著欲予社會大眾閣較了解，自威權統治時期保留落來的不義遺址佮當時的歷史，所以啟用這款標示，向望帶動社會對歷史的記憶和反省。

文化部長史哲，「其實這段逐家已經可能，無真正感受的歷史過程，但是伊煞佇咱的性命血液當中，其實是扮演非常重要的工課，我一直認為這款袂當袂記得的工程，其實上重要就是世代溝通的工程，所以我想揭示揭露的系統是上基礎的工課。」

文化部表示後續會閣陸續推動中央、地方佇各地設立不義遺址的標示，政治受難者陳欽生和姚嘉文攏表示肯定，嘛希望臺灣袂閣有迫害人權的代誌發生。

政治受難者姚嘉文，「遭受彼種苦難咱袂使袂記得，來紀念伊這是第一个意義，另外意義可能就是講，一个社會若是毋知以前遭受的代誌，彼个社會會閣發生這種代誌。」

政治受難者陳欽生，「以後佇臺灣所有的所在，捌發生過遮的代誌的所在，攏會當有這寡標示，予全世界抑是全臺灣人攏看會著。」

經過促轉會審定的不義遺址攏總有42搭，文化部表示，今年拍算欲完成全國10搭不義遺址的標示示範，早起行政院長陳建仁，也佇往過的臺灣省行政長官公署，也就是這馬的行政院設標示，也向望專法會當趕緊通過。

行政院長陳建仁，「行政院嘛當積極推動制訂，不義遺址保存條例的專法，來透過保留往過不義的歷史痕跡，來顯示政府永遠袂閣犯的決心。」

陳建仁嘛強調，不義遺址標示只是第一步，紲來，政府會協助中央地方各機關來活化各地的不義遺址，發揮歷史教育的功能。