嘉義人權展 招政治受難者創作講出監內故事

柴刻的尪仔、一身一身徛佇畫作的頭前，這五十外身代表政治受難者的尪仔當中，有二身較細，看起來親像囡仔的尪仔，藝術家陳武鎮講，這幅作品的背景，就是捌看過有身的民主前輩、因為政治受難予人關，所以囡仔佇監獄內底出世、大漢。

人權藝術家陳武鎮，「佇監獄內看著這兩个囡仔，逐家嘛感覺講，雖然講咱的處境無好，咱拄著無好的代誌，但是阮原仔愛有勇氣活落去，咱出去了後，咱的囡仔，原仔是一枝草、一點露。」

二二八事件紀念基金會佇今年二二八事件77週年進前，佇嘉義市二二八紀念館舉辦特展，邀請仝款是政治受難者的人權藝術家陳武鎮來展覽伊的作品。

參觀民眾邱小姐，「二二八事件對臺灣人，是一个足重要的代誌，我感覺應該愛予囡仔知影，武鎮老師的作品，嘛是真感動人，所以毋免講足濟故事，囡仔直接來看，ﰀ攏有感受。」

二二八國家紀念館執行長藍士博，「咱嘛希望講 會使佇嘉義，來辦一个藝術的展覽，予在地的藝術作品，對咱的二二八的紀念活動，產生閣較深化佮多元的面向。」

陳武鎮表示，佇白色恐怖彼个年代，伊去予人關佇監獄兩冬，雖然時間無講蓋長，但是猶是聽著予人感動的故事，向望透過展覽的木雕佮畫作，予民眾知影佇威權時代受難者的感受佮故事。