臺南府城行過400年 七股鹽雕紹介文史景觀

遠遠看過、塗跤白茫茫，袂輸拄落過雪，遮毋是國外的場景，其實是臺南七股鹽山，今年鹽雕藝術季，頭擺佇寒天舉辦，閣共作品徙出來外口做展示，詳細看鹽雕頂懸，有báng-gà圖樣參古蹟、地方美食元素做結合，唌真濟人來翕相做紀念。

民眾講，「頭一改臺南有這款鹽雕三麗鷗的，而且閣是我上愛的Hello Kitty，內底閣有一寡咱七股在地的，蟳仔、蝦魚佮魚仔。」

雲嘉南管理處長許宗民表示，「鹽雕有無仝款的型態，包括伊騎跤踏車伊做咱的鹽鐵，去咱臺灣四界去看一寡風景，抑是講伊來到咱臺南蓋好食的玉井，來食咱的檨仔冰。」

主辦單位指出，in用300噸的粗鹽落去刻，攏總做九座鹽雕，其中一座5米懸，8公尺闊的作品，嘛創下有史以來上懸的紀錄。藝術總監講，鹽雕咧刻，每一步攏真幼路，過程細節攏愛真講究，特別這改閣搬出來外面，加減會受著氣候影響。

藝術總監陳漢中強調，「東北季風足大的，你看這馬風閣來啊，你看佇咧風足透的時陣，阮咧做、足歹做的，因為阮的雕刻刀攏會一直搖，無法度相準，所以阮欲做的時有這个困難度，做咧外口較驚講有風雨按呢。」

若看鹽雕無夠癮，閣有地景藝術通欣賞，藝術家抾海邊仔的水流柴、蚵仔坪等廢棄物，共變做真媠的藝品，提醒逐家做伙疼惜這片的海洋。今年藝術季展期到明年3月初10，民眾會使來遮看無仝的地方風貌。