過去新竹竹北東西兩爿長期以來地方發展差誠濟，特別是倚海地區閣較嚴重，這幾年經過輔導成立休閒農業區，透過規劃和整合當地休閒觀光資源，嘛予閣較濟少年人願意轉來故鄉服務。（此則新聞標題、導言、內文皆為臺語文。）
手提漁網、整理家己辛苦培育的魚塭仔，已經轉來故鄉服務倚8冬的陳彥呈，過去佇外口食過誠濟款頭路，後來經過思考，決心轉來創業、拍拚家己的事業。
竹北市水月休閒農業發展協會總幹事陳彥呈表示，「開計程車、賣厝、電子公司業務，做生理場了後失敗，感覺做袂落去矣，我嘛是轉來矣，轉來飼魚仔，其實是自我細漢就一直佇摸，所以這是我上熟的所在。」
另外一位是才拄轉來4個月的劉先生，因為過去讀冊的時、就是讀水產相關科系，所以會當轉來故鄉做養殖業，對伊來講、是上好的選擇。
回鄉青年劉先生講，「遮離阮兜算誠近，這爿的養殖嘛有一定的規模，然後就選擇過來，因為我大學嘛是讀水產養殖系。」
占地480公頃的休閒園區，其中飼烏魚、蝦仔以及石斑的面積有60公頃，經過輔導已經變成民眾☒迌的好所在，目前嘛當咧思考按怎予閣較濟少年人，願意轉來故鄉作穡。
竹北市水月休閒農業發展協會理事長戴章興強調，「人愈來愈濟，有一寡產業就是咱烏魚子，漸漸欲斷層矣，毋過好佳哉有一寡少年，肯轉來接，繼續傳承落去。」
竹北市長 鄭朝方講，「會當予閣較濟青農，以及青年、做漁業的朋友，用無仝款的方式，無論未來觀光產業，抑是加工產業、行銷品牌的產業，攏非常需要少年人來參社會對話。」
在地業者講欲按怎透過提懸工作機會以及培養好的人才，是目前真重要的課題，希望未來會當透過青年回鄉，予城鄉發展出在地的特色文化。