傳藝中心「神童派對」 百身童仔踩街大遊行

陣頭行過台北市士林的街頭，大人囡仔鬥陣參與。這是國立傳統藝術中心舉辦的「2023鬥陣趣：神童派對」活動，邀請百外身傳統陣頭定看著的童仔，佇這个拜六禮拜鬥陣參與活動，除了踩街以外，也有表演、市集這寡通予民眾參與。

國立傳統藝術中心主任 陳悅宜：「這屆阮配合是兔年，動如脫兔，所以咱就以神童動如脫兔、能量滿滿，以神童來做主題、來規畫。阮攏會強調多元，閣有傳統創新同齊行，閣有世代的傳承。」

開幕式以國光劇團的「五福靈官」開幕，為活動起鼓、也祈求平安。傳藝中心的鬥陣趣活動，今年已經行到第三屆，今年是參在地的宮廟「士林慈諴宮」合作，深入在地文化。

士林慈諴宮主任委員 江運永：「咱慈諴宮有三對神將，攏超過100年，而且這馬猶有咧出陣。阮今仔日就出一對神將，超過一百年的來配合。地方的大廟佮地方的文化，若結合做伙，這本來就真有看頭。」

講著文化傳承，慈諴宮主委江運永表示，現代人對陣頭文化，定有攏是☒迌囡仔的錯誤刻板印象，in望透過這款的活動通破除迷思，予少年輩看著台灣陣頭的媠，繼續傳承咱的文化。