朱銘銅雕剾風曝日40年 高美館修復拚重現

佇美術館後爿的銅雕作品，頂懸閣有刻字抑是修正液寫過的痕跡，修復師提工具咧清除修復，這是朱銘老師的太極系列銅雕的作品，由朱銘美術館的修復師特別落南，親手修復作品，修復現場館方嘛是頭一擺用透明的網仔，欲予民眾會當參觀修護藝術品的過程。

民眾表示，「本身阮對朱銘老師的作品，就有看過一寡，嘛了解、知淡薄仔，這擺做按呢的修復，未來會佇美術館做陳列佮展出，嘛相當期待。」

民眾也講，「有予修復，阮感覺可能是逐家，政府抑是社會環境，開始重視文化資產的工課。」

1986年朱銘大師完成這2件作品就囥佇高雄中正體育場，到今欲40年，因為長期囥佇外口吹風曝日，雕塑作品毋但有蟲卵，嘛有人為破壞，親像刻字抑是用修正液寫字等等，是誠歹修復的工課。

高雄市立美術館代理館長林羿妏說明，「對中正體育場，徙轉來的過程當中，阮嘛有看著頂懸有刻一寡字，甚至是有修正漆，留落來的痕跡，目前修復師當咧拍拚，予作品恢復到上好的狀態。」

囥佇運動場的兩件作品，是九月底徙到高美館，由三名修復師輪流修復，按算11月底完成，到時朱銘大師的作品就會佇高雄市立美術館戶外展出。