魚虎、鮕鮘入侵鳥松溼地 民團辦釣魚掠外來種

釣客手提著魚釣仔共魚餌擲出去，無外久時間就掠著魚仔，釣起來這隻就是會危害台灣原生種的泰國魚虎，鳥松湳仔地出現包括泰國魚虎、鮕鮘佮吳郭魚等等外來魚，所以高雄市野鳥學會今年利用釣魚證方式，開放釣客鬥相共來掠外來魚，短短一个月時間，就釣著14隻的外來種魚仔。

鳥松溼地主任蘇昱任表示，「舉辦釣魚證是一个課程，會馬上經過考核，若是通過的朋友，攏會當核發釣魚證，有釣魚證了後，就會當憑證來溼地遮，按照開放時間，進行外來種魚類移除。」

其實這幾年各地攏有外來魚種的困擾，因為外來種魚會食原生種魚仔抑是鳥類，破壞生態，為著保護湳仔地內底原生種，釣客攏會準備假的魚餌來釣，袂破壞生態。

釣魚客：「釣魚用的生餌，有一寡用的是化學調製的，對水質的汙染其實真嚴重，嘛有可能予原生種的魚，身驅頂聿著一寡味，顛倒予外來種的魚仔食掉。」

這項釣魚證計畫，自今年七月開始實施，兩梯次報名，攏總有22位釣客通過，只要有釣魚證，平常時就會當預約來釣，因為效果袂䆀，高雄市野鳥學會暗算明年閣會繼續辦，向望會當移除外來種，維護生態平衡。