第58屆金鐘獎公佈名單 公視臺語台有4項入圍

阿波羅男孩，你先佮我來

公視臺語台、台語有影品牌當中的「阿波羅男孩」，描寫自閉症患者的議題；戲齣當中的演員陳妤，是入圍第58屆金鐘獎的「迷你劇集電視電影女配角獎」。

人選之人：明仔載就是改變的日子

佮陳妤競爭同一个獎的入圍者，閣有拄宣布欲做郭台銘副手的演員、演「人選之人」的賴佩霞。
抑若公視臺語台、除了阿波羅男孩，閣有入圍袂少獎項。佇「自然科學佮人文紀實節目主持人獎」，無事坐巴士的主持人林庭玗、閣有大港ê台灣的主持人張耀仁攏入圍；「兒童節目獎」的部份，臺語台、原民台、客家電視台、佮公視合作的「WAWA哇！」也入圍。

第58屆金鐘獎節目類評審團主委李景白表示，「特別今年咱也沓沓發現，有真濟網路的節目出來，其實這是一个真好的代誌，咱無閣共電視當做唯一的平台，是以所有的影音平台。」

另外、外界也關心，前一站仔的metoo性騷擾風波，有濟濟藝人攏牽涉在內，敢有影響著評審的考量？

第58屆金鐘獎戲劇類評審團主委 唐美雲說明：「咱這組並無特別提出來討論，按怎去評論這件代誌，評審並無特別去說明，抑是講訂規矩，阮顛倒是投票的時陣，才發現想法真鬥搭，逐家是做按呢的選擇。

第58屆金鐘獎節目類評審團主委李景白，「評審正反想法攏有，各款意見攏會予人提出來，逐家有各人的看法，提出來了後逐家互相討論，討論煞就轉來家己，轉來家己的專業。」

文化部表示，第58屆金鐘獎戲劇類計共有1155件作品報名、節目類有927件，經過2個外月的討論，計共選出2百外个作品，欲爭取48个獎項；節目類、戲劇類頒獎典禮會分開、分別會佇10月20、21舉辦。