「大風之島」記錄樂生療養院 奪坎城影展上大獎
鄭雅文 張育睿 / 綜合報導
發布時間：
更新時間：
第76屆坎城影展前幾工結束，台灣這改有一个紀錄、樂生療養院的紀錄片《大風之島》佇坎城電影"市場展"當中提著上大獎，也就是1萬箍歐元的現金獎。導演許雅婷講，伊希望逐家看著的毋但是抗爭，嘛會當看著院內序大的性命故事。(本則新聞標題、導言、內文皆為臺文)
代表台灣參加法國坎城電影市場展紀錄片單元提案競賽的《大風之島》。佇30幾个國際競爭者中，提著大獎一萬箍歐元現金獎。
導演 許雅婷：「影片拍的過程是足孤單的，就像恁攏知影的，恁愛長時間家己對抗主流，面對所有的批評。」
《大風之島》講的是臺灣樂生療養院的事件，這改搬上國際舞台除了引起討論、也予外界看著導演許雅婷用20冬時間，無放棄的拍片精神。許雅婷講，伊自大學時期接觸樂生議題才知影原來新北過去有這種關麻瘋病人的所在，彼當時感覺真意外，也開始參加相關活動、抗爭記錄影像。中間雖罔有中斷但持續咧做。《大風之島》其實就是咧講院內彼寡序大的生命歷程、按怎抵抗迫遷，按怎有尊嚴咧活咧，予逐家通看著這寡人勇敢佮擲開弱勢者的一面。
導演 許雅婷：「這對病人來講意義重大，因為從來無予外面的世界看著。這馬透過電影，逐家看著遮的人、聽著聲音，這是一件充滿力量的代誌。」
許雅婷講，伊真感謝評審團，會提著大獎真正有淡薄仔意外，但對伊來講是一个足大的鼓勵，對未來影片的製作也有真大的幫助。《大風之島》預計今年底會完成，片長大約兩點鐘。紀錄基層運動之外、也希望序大得著應該有的尊重。
買湘瑩/編輯
2022杭州亞運 台灣百金之路
