美式大賣場賣的冷凍莓有A肝病毒，食藥署掛保證會使按照食安法、共業者罰，也無排除會使拍團體訴訟討賠償。毋過長期咧維護消費者權益的消基會指出，無論是政府對業者的行政罰；抑是根據法院判決、業者愛予消費者的賠償，金額攏傷低，是真僫對業者有警告效果。(本則新聞標題、導言、內文皆為臺文)
食藥署副署長 林金富：「目前咱收集證據也差不多矣，目前當咧做予業者報告意見的程序。食安法絕對會使開罰6萬到2億。」
美式大賣場、予人驗出、賣的冷凍莓有A肝病毒，食藥署掛保證、政府絕對會使對業者開罰；早起有立委要求，食藥署針對查驗、落架，愛閣較積極，也呼籲行政院消保會、主動協助民眾集體求償。
行政院消保會簡任消保官 王德明：「阮無排除拍團體訴訟，阮也參兩大消保團體有接觸佮聯絡。」
食安法第56條規定，消費者會使請求法院，按照消費者受侵害的程度，向業者求償500箍到30萬箍；根據第44條，政府也通對業者處6萬到2億的行政罰。但是消基會指出，這寡罰金、上低的金額、樓地板攏傷低，真僫對業者有警告的效果。
消基會副董事長 徐則鈺：「通常實務上無論是行政機關抑是法院，佇罰金的部份其實攏會離下限較近。」
消基會建議，無論是行政罰、抑是賠償，樓地板攏應該大幅度提懸，行政罰建議對6萬提懸到100萬；賠償對500箍提懸到1萬箍。若無，啥人會為著500箍、去拍官司。
消基會副董事長 徐則鈺：「有偌濟人會為幾百箍的賠償去拍官司？譬如最近判決確定的胖達人的麭，每一个消費者通得著的賠償大概就幾百箍、幾千箍。」
雖然食藥署講，目前有食安基金、通幫助消費者、拍團體訴訟，但是消基會認為，實際上通得著的金額真少，民間的消費者保護團體資源嘛無夠、欲舉證真困難；消基會認為，若是會當由政府出面、提起團體訴訟，欲要求業者賠償，可能會較簡單。