松山慈惠堂母娘踅境 蔡總統參加起駕儀式

臺北市松山慈惠堂的母娘出巡，總統蔡英文、內政部長林右昌，佮臺北市長蔣萬安攏有來參加，佇今仔早起正式起駕。

總統，蔡英文表示：「我欲特別感謝松山慈惠堂，發揚母娘的慈悲精神來做公益。親像捌捐超過40台救護車，閣有提供清寒學生的獎學金，遮的行動攏是為臺灣社會，帶來正面的能量。」

王母娘娘出巡，沿路信眾排隊軁轎跤，佇29、30這兩工繞境，祈求臺灣風調雨順、國泰民安。

松山慈惠堂總策劃長，李瑞彬表示：「今年參加的人數比往年增加2倍至3倍，今仔日估計差不多8千人至1萬人。」

已經有16年歷史的「臺北母娘文化季」繞境嘉年華，有各地陣頭來慈惠宮鬥鬧熱，藝閣花車車隊護駕，現場是鬧熱滾滾。

民眾表示：「逐年攏綴母娘來繞境。」

民眾表示：「逐年攏足鬧熱，逐年攏來看母娘文化季，來軁轎跤感覺足好。」

母娘是民間對媽媽抑是濟歲女性的稱呼，王母娘娘是民國38年以後，佇臺灣出現的民間信仰，信徒見面攏會以「母娘慈悲」相借問，臺北松山慈惠堂以社會公益出發，逐冬佇母親節進前舉辦，繞境結束，會佇臺北大巨蛋辦大型的音樂會，提醒信眾感恩母親。