下晡變天轉溼冷 9縣市低溫特報.寒甲賰10度
郭柏均 張育睿/臺北報導
發布時間：
更新時間：
目次
今仔日早時仔日頭真焰，毋過下晡煞開始變烏陰。台灣各地頭毋但溫度會開始降，拜二暗、拜三暗，冷的感覺上明顯，上低會到10度左右。北部、東部地區，也會開始落雨，提醒民眾出門進前，愛注意天氣狀況。(這條新聞標題、前言是臺語文。)
台北市早時日頭真焰，外套強欲穿袂牢，佇台東大武閣出現36.5度的高溫。毋過下晡煞雄雄變天，天頂烏陰烏陰，閣明顯變涼冷；因為冷空氣就欲開始影響台灣，拜二暗、拜三暗涼冷感受上明顯。
中央氣象局預報員葉致均說:「這波冷空氣上強的時間，就咧拜二暗時到拜三透早這段時間，估計中部以北佮東北部，低溫11到12度左右，其他地區是14到15度的溫度，拜三暗時到拜四透早，因為水氣明顯較少，會有輻射冷卻影響之下，台南以北、東北部低溫，大概10到12度左右。」
受著華南雲雨區影響，台灣中部以北、東半部、佮山區也會開始有雨，中南部是以濟雲的天氣為主。
中央氣象局預報員葉致均說:「中部以北、東半部地區，佮南部山區，規个攏會有一寡落雨的狀況，毋過因為這是屬於華南雲雨區東徙的影響，所以基本上雨水袂傷濟。」
氣象局估計，拜二雨水上濟，拜三開始雨水就會減少，提醒民眾出門愛紮雨傘；另外針對沿海地區，會有強陣風出現，可能有8級到10級，提醒民眾愛注意海面的風湧。
張曼亭/編輯
專題｜改造地獄路 台灣行人路為何難行？
