過年了後，台積電講對2月開始欲分時段上下班，新竹市政府嘛綴咧宣布，對3月開始，市府員工上下班時間，有一點鐘的伸勼，希望透過分流上班，來解決大新竹交通上下班會窒車的問題。
上班時間欲去科學園區的道路，總是大窒車，台積電宣佈上緊對2月開始實施彈性上下班，這馬新竹市政府嘛講，三月開始員工上下班的彈性時間對原本半點鐘調整做一點鐘。
新竹市長高虹安表示：「想辦法予園區的企業，會當來支持彈性上下班的措施，紲落來市政府佇三月初一嘛綴咧實施，包括像台積電的做法，阮的彈性上班對半點鐘延長到一點鐘。」
除了拜一到拜四時間伸勼調整做一點鐘，若是拄著拜五抑是拜六愛補班，彈性上班時間會當閣延長變做點半鐘，也就是講員工上緊下晡4點半就會使下班，市府希望用這款方式來舒解大新竹地區窒車的問題。
市府員工表示：「對其他有接送囡仔的同事，應該會較歡喜，因為等於會當更加配合接送囡仔，然後嘛較方便。」
市府員工表示：「因為我平常時早起6點會去泅水，所以延後上下班時間，對我來講算是真有幫助的代誌，按呢我就免遮爾早起床。」
市府除了希望透過分流上下班，來解決窒車的問題，若是效果袂䆀，紲落來嘛會向企業來推廣，希望做伙改善大新竹的交通環境。
