嘉義縣定古蹟林開泰舊厝 今修復完工明年開放

眾人共同揭幕，舞蹈家林懷民的家族這間對清朝一直到今的古厝，經過6冬的修復，按算欲佇明年正月對外開放。文化部長李永得表示，這間厝有誠重要的歷史價值，文化部會全力來支持。

文化部長 李永得表示：「欲保留這款的文化資產，流傳予後代逐家來使用，是非常無簡單，愛感謝咱林懷民家族」

雲門舞集創辦人 林懷民表示：「秉持阮阿祖予阮的家訓，就是公爾忘私，真緊就決定共這間厝捐出來，因為文化部佮縣政府in用心處理修整，這馬總算會當開幕佮社會來見面」

這間培桂堂原本是林懷民的阿公林開泰的診所佮徛起的所在，經過修復，當初的診所、客廳、新娘房、讀冊間攏有展覽彼當陣林家的生活文物。
林懷民表示，這間厝捐予縣政府就代表是逐家的，希望透過文化的經營，毋但傳承家族的精神，嘛予逐家感受著新港美好的風土。

新港文教基金會董事長 陳政鴻表示：「會當來遮行行的，來感受懷民老師in家族，懷民老師人生第一个舞台，佇遮大漢起來，我相信阮會好好利用這个空間，來辦畫展嘛好，來辦音樂會也好，予咱少年囡仔會當真佮意這个所在」

新港文教基金會表示，希望透過這个所在，予嘉義縣閣加一个文化佮觀光的基地。