全國語文競賽新項目 用日常臺語讀劇添心適感
林思皓 謝季潾 / 臺北報導
發布時間：
更新時間：
目次
全國語文競賽昨昏結束，今年有新增加一个比賽項目，就是本土語言的讀者劇場。仝班的學生愛合作，佇母語對話的情境內面讀劇本，透過這款方式，希望學生共母語變做生活語言，毋是為著比賽才來學的語言。
手提劇本，用臺語演出學校內底的故事，聲情夠、發音正，in是臺北市南港國小六年仔的學生。
導師 史翊君表示：「想欲予in佇咧學校最後一年，會當去外口看覓，看別人、佮別的學校做交流」
用臺語交流，老師講的交流機會是全國語文競賽今年新辦的「本土語言讀者劇場」比賽。七个仝班的學生，經過個外月的練習，初四得著全國特優。
學生 朱同學表示：「就足歡喜的、嘛足感動的，就是阮遐爾骨力咧練習，按呢著第一名足歡喜的」
學生 吳同學表示：「阿公阿媽抑是阿爸阿母攏會講，因為in是南部的人，所以就是平常時，國語佮臺語攏定定講」
讀者劇場強調用對話的方法，予學生佇日常情境內底講本土語言，嘛透過評審提問，予囡仔毋是干焦會曉背稿，閣著會曉使用語言。
南港國小校長 張嘉芬表示：「透過這个比賽，透過咱講囡仔，這个演戲對話的過程，in可能會感覺，講台語是一个足趣味的代誌，可能希望講，因為透過按呢的比賽，有愈來愈濟囡仔會當來參與」
本身嘛是臺北市本土語教育輔導團召集人的張嘉芬表示，這个比賽限定仝班報名參加，可能嘛會當帶動佇班上講本土語言的氣氛。
