食酒駛車予民眾黨開除 林冠年今開記者會喝冤枉

記者會現場林冠年當場用漉喙水洗喙，而且直接進行酒測，酒精的濃度連鞭超過標準，一下看，漉喙水頂懸寫的成份確實有酒精，面對進前酒後駛車的爭議，原底代表民眾黨參選竹北市長的林冠年出面喝冤枉。

原民眾黨竹北市長參選人 林冠年表示：「彼當時我並無提著這張確認單，我叫是就是測煞簽名做筆錄就好，我一開始就有要求欲洗喙，毋過警察無欲予我洗喙」

新竹警方是佇8月的時陣，接著民眾報案發生車禍，後來到病院才發見林冠年酒精濃度超過標準，依照公共危險罪嫌移送。林冠年強調，彼工只是疲勞駕駛絕對無酒後駛車，針對紲落來敢會繼續參選，本人表示會閣再討論。

原民眾黨竹北市長參選人 林冠年講：「我會閣再參民眾黨討論，因為選舉公報頂頭仝款是民眾黨，我嘛知影高層真關心，所以阮會先討論，才閣向逐家交代」

高虹安競選辨公室發言人 徐千晴表示：「依照黨內的法制佮規則進行評議，捍衛堅信的價值，依照規章撤銷林冠年的提名、開除黨籍，彰顯本黨防止酒駕的決心」

民眾黨新竹黨部主委高虹安的辦公室講開除的處分是為著彰顯決心，毋過林冠年猶原希望黨部聽候司法判決了後，才閣做進一步的決定。